Utùer èl tènz fòje,
bór dè erba e piantèle dré al Cés.
Sa ‘mpisa nel vért mace dè zalcc, róss e marunsì.
Fónne ‘ncuciade le cata sö sgrégn amar,
presiuza èrdüra dè mèter vià per l’inverno.
Sbarbèla ‘l cél riflèss sö le préde ciare è löstre.
Prèst sa scont èl sul, frisculina sa fa l’aria.
Pensieruze le par le umbrìe, vèrs sera.
A bélaze scór l’aqua, ‘ngrimida e griza.
Airù e paserì i sa ‘ngnata per la nòtt.
‘na sifulada dè pastùr
la riciama i cà a trà ‘nsèma
‘l ròs dè pegore strache e sasie.
A pò stasera ‘èl Cés nel so tàzer
èl canta la vita.
Ornella Olfi
